عشان بدي اكتب هاد العنوان قررت إنو رح اكتب بالعربي هل مرة. وصلت على أميركا قبل اسبوعين و بلشت من العاصمه واشنطن و بعدين على هيوستن، طبعاً هدول مدينتين معروفين. بعدين اكتشفت اني رايح على مدينه اسمها سينت لويس بحياتي ما سمعت فيها و بس وصلت هناك عرفت ليش عمري مش سامع عنها.

سينت لويس مدينه ما فيها الفشخرة تبعت باقي المدن إلي بعرفها أو شفتها، يعني ببساطة الجماعة مفلسين و عباب الله. لفيت كتير و زرت مدارس، جامعات و شركات و بآخر يوم رحت أقابل مجموعة مجتمعين بدهم يطوعو بحديقة عامه عشان ينظفوها و يصلحو شوية شغلات بس إلي فاجأني إنو مش هاد الهدف الأساسي للاجتماع، هدول مجموعة مسلمين، مسحيين و يهود بجمعية لحوار الأديان. طبعاً الموضوع بالنسبه إلي كان كتير غريب خصوصاً بعد ما قالولي إنو بهاي المدينه كان المسلم أو اليهودي ما بطلعلهم يتعالجوا بمستشفى مسيحي (يا فرحتهم)، يعني يموتو الله لا يردهم.

طبعاً أنا ما بلومهم بالمرة إذا هيك الوضع لازم يلاقولهم حل و يجتمعو هيك إجتماع، بس مش هاد الموضوع؛ الموضوع إنو أنا قلتلهم جمله وحده “يا جماعة أنا مستغرب كيف إنتو المفروض تكونو أقوى دوله بالعالم و مش عارفين تخلصوا من هاي التفاهات، و نحنا إلي انتو معتبرين إنا عالم ثالث أو عاشر منستحي على دمنا ومنحترم غيرنا”، هاي الجمله متل إلي كانو مش مصدقين و واحد يحكيها. وحده منهم قالتلي إنت مجنون إذا مفكر هيك، هاد الحكي عندكم مش عنا… إذا هاي الحديقة إلي إنت فيها بموت فيها ٢-٣ بالأسبوع طخ! و نحنا مش لاقيين ناكل ولا نشرب بس شاطرين يسحبوا منا الضريبه ويعيشوا الجيش إلي خارب بيتكم.

المهم كلهم بلشو يتشكونو و وحده منهم اعترفت إنو عشان ابنها ياكل بعد ما مات جوزها طخ بالحديقة إلي كنا فيها، هي ببساطة مهنتها الدعارة في أقوى دوله إلي عم بحكي عنها والي ما عرفت ادرسها ببلاش.

و الباقي عندكم…